BAHAN PEMBINAAN

HOLONG MANGIHUTHON HOLONG NI JESUS

(Johannes 13;31-35)

Pdt. Irvan Hutasoit, M.Th

1. Adong dua Siingoton di Kamis Putih. Parjolo, parningotan uju diburi Jesus pat ni angka siseanNa. Paduahon, parningotan di na marsipanganon Jesus dohot angka siseanNa; laos I muse ma muse dibahen gabe ojahan Ulaon na Badia di tongatonga ni huria. Na mangarahut dua parningotan I ima holong. Dibagasan holong do diburi Jesus pat ni angka sisean I; laos dibagasan holong do umbahen na dilehon Jesus daging dohot mudarNa na dipatudu marhitehite pandohan na adong uju na rap marsipanganon Ibana dohot siseanNa i. I muse do sipabagasaon marhitehite turpuk di Kamis Putih I; na boi tajaha marhitehite pandohan na adong di ayat 24, “Patik na imbaru ma hulehon tu hamu: Nuaeng ma masihaholongan hamu; songon holon ni rohangku di hamu, naeng ma songon I dohot hamu masihaholongan”
2. Molo tabereng turpuk on, adong do dua pandohan na mansai ringkot sipabagason, ima: anaha (ayat 33) dohot patik na imbaru (ayat 35). Tabereng ma jolo lapatan ni pandohan i marsadasada. Parjolo, pandohan anaha. Diputik sian hata Gorik do pandohan anaha i. Di hata Gorik didok ma I, teknia. Pandohan teknia manggombarhon hajonohon ni sada ama do I tu sada dakdanak. Dang holan jonok di tutur, alai tong do jonok di parrohaon. Molo digorahon sada ama do teknia maradophon sahalak dakdanak, marlapatan ma jonok ni ama I tu dakdanak i. Sai dihalojahon ama I do mambahen na denggan tu dakdanak i. I do lapatan ni teknia. Pandohan teknia do dipangke Jesus manggora siseanna hombar tu na tarsurat di ayat 33 i. Anggo sian tutur do, dang tardok na jonok Jesus tu angka siseanNa i. Alai hajonohon ni Jesus tu angka siseanNa marhitehite pandohan teknia pataridahon naung lobi sian partuturon do na pajonokhon Ibana tu angka sisean i. Nang pe dang jonok tutur nasida, alai dang diorui Jesus gogoNa laho pataridahon holong maradophon nasida (jaha: sisean i). Lapatanna, digora Jesus do hita dohot pandohan teknia, anaha. Na naeng dohonona, jonok do dibahen Jesus diriNa tu hita marhitehite na diharikothon Ibana do patupahon na denggan tu dirinta sandiri.
3. Paduahon, patik na imbaru. Unang lilu pangantusionta taringot tu hata ni Jesus na mandok di ayat 35 I, “Patik na imbaru”. Ndang na so ringkot be patik naung dipasahat Debata songon na tarsurat di Padan na Robi. Manang, ndang asa pasidingon patik na adong di Padan na Robi i. Ai molo taputik sian pandohan ni hata Gorik, hata “imbaru” na diputik do sian hata kainos. Molo talapati hata kainos I, boi ma tasarupahon tu pandohan di Bahasa Indonesia, penyegaran manang pembaharuan. Lapatanna, dang pasidinghon naung adong, alai paimbaruhon naung adong asa lam dasip ulahonon. Jadi, molo didok Jesus do di ayat 35 I, Patik na imbaru na dipasahat Jesus, ima siulahonon ni angka siseanNa I, lapatanna ima: haimbaruon ni pingkiran asa dasip mangulahon patik ni Debata.
4. Haimbaruon na naeng siondolhonon dison ima mangihuthon holong ni Jesus. Songon hatorangan di ginjang I, ia patik na imbaru dang na laho pasiding patik naung pinasahat ni Debata, alai padasiphon do. Alani, boi ma antusanta, Jesus do impola ni Patik i. Songon na didok di Matius 22:37-40, pargok ni patik ima holong tu Debata dohot holong tu dongan jolma. Patik na songon I do tarida sian na binahen ni Jesus, dihaholongi Ibana do jolma i. Alani, haimbaruon ni patik ima uju taihuthon holong na binahen ni Jesus tu hita jolma. Songon holong naung pinatuduhonNa I ma tapatuduhon di portibi on.
5. Songon naung pinatorang di ginjang, na adong do dua siingotonta di ari Kamis Putih. Dua parningotan pataridahon holong ni Jesus do i. Alani ma, asa marimpola ari Kamis Putih on tu hita, ringkot situtu asa tabahen holong ni Jesus gabe bogas manang andor sipaihutihonta di ngolu siganup ari. Molo dung songon I tabahen, tangkas ma hita na gabe sisean ni Jesus di portibi on. Amen.

Kategori: Sermon Penatua | Tanggal: 26-Mar-2021