BAHAN PEMBINAAN

HARAJAON NI JESUS IMA HARAJAON LAHO MANGHOPHOP

(Lukas 19:20-38 [Jamita Partangiangan Minggu Palmar)

Pdt. Irvan Hutasoit, M.Th

1. Di minggu on, nunga bongot hita minggu na nigoaran, Minggu Palmarum. Siingotonta dison ima parbongot ni Jesus tu Jerusalem na parpudi andorang so ditangkup Ibana. Laos barita parbongot ni Jesus I do muse gabe turpuk di partangiangan Palmarum. Tabereng ma jolo, angka aha ma siputihon sian turpuk on.
2. Andorang so bongot do pe Jesus tu Jerusalem, parjolo disuru Ibana do dua halak siseanNa laho mambuat sada anak ni halode na tartambat (jaha: ayat 20). Huroha dang apala tangkas diboto sisean na dua I ise nampuna anak ni halode i. Alani, asa unang ganggu roha ni nasida laho mambuat anak ni halode I molo dibereng halak, diajari Jesus ma nasida laho mambahen alus, ima: “Ringkot do I di Tuhan i!” (ayat 31, pat. Ayat 34). Jadi na ringkot siputihonta sian turpuk on ima pangoloion laho mangulahon na ringkot di Tuhan i.
3. Tapamasuk ma jolo hatorangan I tu tolu siulaon ni huria di portibi on, ima: parbaritaon na uli, parsaoran, dohot ulaon asi ni roha. Di siulaon na parjolo I, ringkot situtu ma molo hatorangan na di ginjang I tabahen gabe ojahan pangantusion. Ulaon parbaritaon na uli dang ulaon laho manggohi na ringkot di bagasan huria. Ulaon parbaritaon na uli ndang laho pabalgahon goar ni huria. Ulaon parbaritaon na uli ima laho mangulahon na ringkot di Tuhan i. Manang, ulaon parbaritaon na uli ima laho pabalgahon goar ni Tuhan i. Dang adong na asing sian i. Jadi, molo marbarita na uli I hita, unang taloas gabe marparbue tu habalgaon ni goarta, alai ingkon habalgaon ni Tuhan I do.
4. Na mangihut muse, na ringkot siberengonta sian turpuk on ima panjanghonon ni pangisi ni Jerusalem di haroro ni Jesus. Tabereng ma jolo I di ayat 38. Ndang tardok hasomalan na imbaru na binahen ni natorop I laho manjanghon Jesus di Jerusalem. Sarupa do pandohan ni pangisi ni Jerusalem laho manjanghon Jesus dohot pandohan ni halak Jahudi laho manomu raja dung mulak sian porang mamboan hamonangan (pat. Pslamn 118:26). Sian pangalaho ni pangisi ni Jerusalem di na manjanghon Jesus I, boi ma antusanta, balga ni roha nasida manjalo haroro ni Jesus (nang pe dung piga ari na mangihut muse, torop do pangisi ni Jerusalem na marsurak di adopan ni si Latus mandok asa diparsilanghon Tuhan Yesus).
5. Antong aha ma siputihonta sian panomuon ni Jesus di Jerusalem. Sungkunsungkun di hita, ise do Jesus di ngoluta on? Sian panomunomuon ni Jesus di Jerusalem, satolop do hita molo tadok, ia Jesus ima Raja di ngolunta. Molo tung pe sarupahonon haroro ni Jesus hira na manaruhon hosanna tu Jerusalem, alai laos I do pahothon pangantusionta, ise do Jesus di bagasan ngolunta. Ia Jesus ima Raja na olo manghophop na ginonggomanNa. Alani, marasing ma harajaon ni Jesus dohot harajaon na adong di portibi on. Molo raja di portibi on, na ginonggoman I do mangalehon dirina jumolo tu panggomgomina. Alai molo Jesus, jumolo do Ibana mangalehon diriNa tu na ginomgomanNa. Ima harajaon ni Jesus na naeng sipapataron di portibi on.
6. Alani, molo rumang ni harajaon ni Jesus na olo manghophop hita, saonnari, dang adong be sidalian di hita asa mandao sian panghophopNa i. Marhitehite turpuk on, diarahon ma hita asa ro manopot Jesus na rade manggomgomi dohot manghophop hita.

Kategori: Sermon Penatua | Tanggal: 26-Mar-2021